રથ આગળ વધતો રહે છે: રથયાત્રા આપણ ને કેન્સરની યાત્રા વિશે શું શીખવે છે

દર વર્ષે રથયાત્રાના દિવસે હજારો હાથ ભેગા મળીને એક જ રથને આગળ ખેંચે છે. કોઈ એક વ્યક્તિ એકલા આ રથને ખેંચી શકતું નથી – અને રથ પણ સીધો કે અટક્યા વગર આગળ નથી વધતો. તે ક્યાંક થોભે છે, ધીમો પડે છે, ક્યારેક સંપૂર્ણપણે અટકી પણ જાય છે – તો પણ યાત્રા છેવટે પોતાના મુકામ સુધી પહોંચે જ છે.

મારા ઓપીડીમાં પણ લગભગ દરરોજ મને એવા દર્દીઓ અને પરિવારો મળે છે જે પોતાની જ એક પ્રકારની યાત્રાની વચ્ચે હોય છે – જેમાં ધીમા દિવસો, થોભાવ, અને ક્યારેક શંકાની ક્ષણો પણ હોય છે. આજના દિવસે મને આ બંને યાત્રાઓ વચ્ચે સમાનતા જણાઈ.

રથને કોઈ એકલા નથી ખેંચતું

રથનું દોરડું સેંકડો હાથ એક સાથે ખેંચે છે. કોઈ એ નથી પૂછતું કે બાજુમાં ખેંચનાર વ્યક્તિ પોતાનું છે કે અજાણ્યું — બધા એક જ લક્ષ્ય તરફ સાથે મળી ને ખેંચે છે.

કેન્સરની સારવાર પણ આવી જ છે. આ ક્યારેય માત્ર દર્દીની યાત્રા નથી હોતી:

• દર્દી નિયમિત રીતે દરેક તપાસ, દરેક કપરા દિવસમાં હાજર રહે છે.
• પરિવાર પાછળથી બધી વ્યવસ્થા, લાગણી, અને ચિંતા સંભાળે છે.
• મેડિકલ ટીમ – ડોક્ટરો, નર્સ, ટેકનિશિયન – આગળનો રસ્તો ઘડે છે અને જરૂર મુજબ બદલાવ કરે છે.
• બીજા દર્દીઓ અને સર્વાઇવર્સ, જાણ્યે-અજાણ્યે, પોતાની યાત્રા ચાલુ રાખી ને બીજા ને હિંમત આપે છે.

આ રથને તમે કદી એકલા નથી ખેંચી રહ્યા – ભલે ક્યારેક એવું લાગે.

રથ થોભે છે – તે નિષ્ફળતા નથી

રથયાત્રા દરમિયાન રથ રસ્તામાં ઘણી વાર થોભે છે. આ થોભાવ એ યાત્રાની નિષ્ફળતા નથી – તે તો યાત્રાનો જ એક કુદરતી ભાગ છે.

સારવારમાં પણ આવું જ થાય છે:

• કાઉન્ટ્સ સુધારવાની રાહમાં એક સાયકલ મોડી પડવી.
• કપરા સેશન પછી એક અઠવાડિયું ઓછી શક્તિ રહેવી.
• કોઈ તપાસમાં બદલાવ ન દેખાવો.

આ બધું નિષ્ફળતા નથી. આ તો એવી યાત્રાની અંદરના થોભાવ છે જે હજુ પણ આગળ જ વધી રહી છે.

ડૉ. એક્તાની વ્યક્તિગત નોંધ

“હું ઘણી વાર મારા દર્દીઓ ને કહું છું – લક્ષ્ય એ નથી કે તમે દરરોજ મજબૂત અનુભવો. લક્ષ્ય એ છે કે તમે આગળ વધતા રહો – ધીમે પણ, વચ્ચે આરામના દિવસો સાથે પણ. રથયાત્રા દર વર્ષે મને યાદ કરાવે છે કે યાત્રાને અર્થપૂર્ણ બનવા માટે ઝડપી હોવાની જરૂર નથી – તેને માત્ર ચાલુ રહેવાની જરૂર છે. એ જ શાંત તાકાત, મને તમારા દરેકમાં દેખાય છે.”

ડૉ. એકતા વાલા ચંદારાણા

સાથે લઈ જવા જેવો એક વિચાર

• જો આજનો દિવસ ભારે લાગ્યો હોય, તો એ પણ ઠીક છે – રથ પણ થોભે છે
• જો આજનો દિવસ આશા ભર્યો લાગ્યો હોય, તો એ લાગણીને પકડી રાખો – જરૂર પડે તેવા દિવસો માટે
• બંને પરિસ્થિતિમાં, યાત્રા ચાલુ જ છે

આ રથયાત્રાના દિવસે અમારા બધા દર્દીઓ અને તેમના પરિવારોને શક્તિ, ધીરજ, અને આશાની શુભકામનાઓ.

જય જગન્નાથ.

જો તમે તમારી સારવારની યાત્રા વિશે ડૉ. એક્તા સાથે વાત કરવા માંગતા હોવ, તો સંપર્ક કરો: 8866843843